“Queremos concienciar a toda a sociedade galega sobre a importancia do valor da igualdade e a necesidade de que este valor se materialice nunha realidade o máis pronto posible”. Estas son palabras de Elena Mancha, directora xeral de Relacións Laborais, que foi a encargada de inaugurar a primeira actividade levada a cabo na plataforma de teleformación en igualdade da Xunta de Galicia: un taller de catro horas no que se abordou a orixe sociocultural das diferenzas de xénero e a situación do emprego feminino en relación aos coidados. “Por moi ben que se faga a diagnose dos plans de igualdade, e as empresas vaian adoptando as medidas e as decisións necesarias para facer esta realidade un feito, non chegaremos á igualdade real e efectiva ata que todas e todos gravemos na nosa conciencia social e colectiva que homes e mulleres teñen os mesmos dereitos a exercer a súa profesión e baixo as mesmas condicións”, incidiu Mancha.
Esta actividade, que contou con máis de 300 persoas inscritas, deu comezo a un ano no que o goberno galego reafirma a súa aposta por dar a coñecer as novidades na normativa en igualdade laboral e impulsar o desenvolvemento e a elaboración dos plans de igualdade nas empresas. A sesión celebrada na tarde de onte, distribuíuse en catro horas nas que se trataron temáticas como a división sexual do traballo, o emprego feminino no sector dos coidados desde o punto de vista das estatísticas, as desigualdades no mercado de traballo, as causas da fenda salarial e o teito de cristal, a conciliación, a división sexual do mercado de traballo ou a fenda das pensións.
Aposta pola formación gratuíta
Durante a súa intervención, Mancha aproveitou para comunicar o lanzamento do segundo taller que terá lugar no campus virtual. Será o vindeiro 25 de xaneiro e versará sobre a igualdade de oportunidades e a prohibición de discriminación dende o punto de vista da normativa, os plans de igualdade e a negociación colectiva. O prazo de inscrición xa está aberto.
Tal e como sinalou a directora xeral, espérase que coa formación oferta pola Xunta neste 2022 se avance na igualdade real nas condicións de traballo nas empresas de todos os colectivos que están a sufrir discriminación. Neste ano, están previstas unha vintena de actividades no campus virtual, con máis de 5.000 prazas, dirixidos especificamente a persoas con capacidade de decisión para inserir o principio de igualdade no seo das organizacións, como os procesos de selección, a negociación colectiva, a avaliación da actividade preventiva ou a avaliación de postos de traballo e comunicación.