Segundo os últimos datos publicados pola Xunta de Galicia, un total de 10.694 traballadores deste organismo público estanse a beneficiar das súas políticas de conciliación da vida laboral, familiar e persoal. Isto supón un incremento durante o primeiro semestre de 2018 de 416 persoas respecto aos datos rexistrados en decembro do ano pasado.
Destes case 11.000 empregados, 9.334 acóllense ás medidas de flexibilidade horaria automática, onde é preciso manter un horario fixo de presenza diaria de 09:00 a 14:30, cunha banda horaria flexible de entrada entre 07:30 a 09:00 e a posibilidade de saír entre as 14:30 e as 18:30. O resto, por motivos de conciliación, desfrutan dunha franxa de traballo permitida entre as 07:30 e as 18:30, salvo naqueles casos que sexa necesario establecer unha franxa obrigatoria.
Mediante o emprego das novas tecnoloxías, a Xunta ofrece a opción de teletraballo, permitindo realizar as tarefas fóra das súas dependencias, sempre que o posto o permita, polo que destacan fundamentalmente asesores xurídicos, corpos de inspección, tradutores e informáticos, así como outros postos que permiten unha grande autonomía. Case 300 persoas traballan mediante esta modalidade non presencial, das que un 67,90% pertencen aos servizos centrais.
Desde RSE Xunta de Galicia queremos recordar a importancia que as medidas de conciliación teñen nas organización e empresas, sen importar a súa natureza ou tamaño. Ademais, neste momento estase a traballar desde a Consellería de Economía, Emprego e Industria para difundir a responsabilidade social entre o tecido empresarial galego para que os traballadores da comunidade desempeñen as súas funcións nas mellores condicións posibles.